recent
أخبار ساخنة

الفرق بين ألوان وأنواع الهارد ديسك hdd ssd nvme SSHD

الصفحة الرئيسية

انواع الهاردات والفرق بينها وايهم أفضل

محدش هيقولك الكلام دا ف حتة تاني ، أنواع الهاردات أو الأقراص الصلبة و الفرق بينها ، أبسط توضيح عشان الناس إللى معندهاش خلفية كبيرة هحاول أبقى مختصر و محدد و مش هحط معلومات مش مفيدة أوى ليك كا مستخدم .

الفرق بين ألوان وأنواع الهارد ديسك hdd ssd  nvme  SSHD ايجى نترو Egy Nitro

الفرق بين انواع الهارد ديسك

سوكت IDE 

كان سوكيت على البوردة Pentium III وال بنتيوم 4 و أول إصدارات الـ LGA نوع قديم جداً عبارة عن سوكيت عريض و فيه سنون كتيرة بتركب ف كابل عريض ، و دا إنتهى غالباً من السوق فى 2005 و مبقاش ينزل مكان ليه أصلاً ع البوردات الحديثة و أكبر هارد شفته ليه كان 320 جيجا و كان بطيئ جداً .

سوكت SATA

هو السوكيت المنتشر من بدايات الألفينات و لغاية دلوقتي و هو الأفضل و الأسرع و الأكثر شعبية تم تطويره لكذا إصدار . 

  •  ساتا 1 / سرعته 1.5 جيجا . 
  • ساتا 2 / سرعته 3 جيجا . 
  • ساتا 3 / سرعته 6 جيجا . 
  • و وصل لـ ساتا 3.2 مؤخراً . و دا سرعته 16 جيجا 

و السرعات دى هى أقصى سرعة بيدعمها السوكيت نفسه و السرعة بتاعتك معتمدة ع سرعة الهارد إللي واصل ف السوكيت .

أنواع الهارد ديسك hdd وssd

هارد ديسك hdd 

دا أكتر هارد منتشر ، لإنه رخيص ، و سرعته مناسبة للأغلبية التقنية بتاعته ميكانيكية الحركة يعنى بيتحرك عن طريق إحتكاك مكوناته الداخلية بشكل معين بيشتغل معاك بمجرد إحتكاك الإبرة بالإسطوانة الداخلية و قراية البيانات إللي متسجلة عليها ، دا بإختصار شديد فكرة شبيهة بـ الجرامافون إللي كان بيشغل إسطوانات زمان و فيه دبوس صغير الإسطوانة بتدور تحت منه و الأغنية بتشتغل . و دا فيه منه نوعين بيشتغلوا على سوكيتات مختلفة IDE - SATA و زى ما وضحنا فوق إن الـ IDE إنتهى فى بداية الألفينات فـ الموجود حالياً الـ SATA فقط و سرعة الهارد دا بـ تتحدد من حاجتين 

  •  عدد اللفات و أشهر الأنواع الحالية سرعتها ما بين 5400 - 7200 لفة في الدقيقة  .
  •   نوع السوكيت الخاص به ، هل هو ساتا 1 أو 2 أو 3 ولا IDE .

إيه الفرق بين أنواع الهارد ديسك و الوان الهاردات

هارد ديسك ويسترن ديجيتال الأسود - WD BLACK 

دا يعتبر رقم واحد فى كل فئات الـ hdd ، لكن يعيبه سعره الغالى و أنا شايفه مش هيديك فرق سرعة خرافي قدام الفلوس الزيادة إللى هتتدفع فيه بالإضافة لإن درجة حرارته و صوته أعلى شوية من الطبيعي فـمش برشحه أوي إلا لو محتاج أسرع شئ حتى لو بـ نسبة قليلة .

هارد ديسك سيجيت باركودا برو - Seagate Barracuda Pro

دا النسخة الموازية لـويسترن الأسود بكل مميزاته و رأيي إنه له أفضلية عن الويسترن لكنه مش منتشر فى مصر.

هارد ديسك ويسترن ديجيتال الأزرق - WD BLUE

دا يعتبر من الأفضل للفئة المتوسطة و أحسن حاجة لكافة الإستخدامات سعره مناسب جداً و كفائته ممتازة.

هارد ديسك سيجيت باراكودا - SEAGATE BARRACUDA

دا يعتبر برضو من أفضل الاختيارات و موازى للويسترن الأزرق و غالبا بيكون 7200 لفة ، و بفضله أحياناً و إن كانوا متساويين نسبياً الإتنين فى كل شئ .

هارد ديسك ويسترن ديجيتال الأخضر - WD GREEN

دا لو عاوز هارد معندوش دم و مش بيبوظ لإنه بيتميز بـ إستهلاك قليل للكهرباء و ملوش صوت عالي لكنه ف نفس الوقت بطئ نسبياً عن الموديلات إللى فوق لكنه مش البطأ إللى يوقفك يعني ، فرق طفيف جداً و الموديلات الـ 64 ميجا كاش منه قريبة جداً للويسترن الأزرق .

هارد ديسك سيجيت ديسكتوب - SEAGATE DESKTOP

دا النسخة الموازية لـويسترن الأخضر بكل مميزاته و عيوبه .

هارد ديسك ويسترن ديجيتال البنفسجى - WD PURPLE

هارد مصمم للكاميرات فيه تكنولوجى بتساعد إن الهارد يفضل شغال 24 ساعة طول الاسبوع جديد نسبياً في السوق مقارنةً بالأزرق و الأخضر و مش برشح إستخدامه إلا فى الحاجات إللى مُصنع ليها فقط دا فى حالة إن قدامك إختيارات تانية أما لو مفيش قدامك إلا هو ، هاته عادي مفيش أدنى مشكلة سعره نفس سعر الأزرق تقريباً ، أعلى أو أقل بفروق بسيطة وكسرعة زيه زي الازرق و يحل محله عادى جداً .

هارد ديسك سيجيت فيديو - Seagate Video 3.5

دا النسخة الموازية لـويسترن البنفسجي بكل مميزاته و عيوبه ، كإصدارة قديمة و الإصدارة الحديثة منه بإسم Sky Hawk .

هارد ديسك ويسترن ديجيتال الأحمر - WD RED

هارد مصمم للسيرفرات و الشبكات فيه تكنولوجي بتساعد إن الهارد يفضل شغال7 ايام فى 24 ساعة و فيه بعض الخصائص بتساعد فى الشغل جوا الشبكات بشكل أفضل و برضو مش برشح إستخدامه إلا فى الحاجات إللي مُصنع ليها فقط دا فى حالة إن قدامك إختيارات تانية أما لو مفيش قدامك إلا هو ، هاته عادي مفيش مشاكل لكنك هتلاقيه سعره غالي شوية عن باقي الموديلات نظراً لتخصصه فى شئ معين .

هارد ديسك سيجيت أيرن وولف - Seagate Iron Wolf

دا النسخة الموازية لـ ويسترن الأحمر بكل مميزاته و عيوبه . الخلاصة ويسترن أزرق - سيجيت باراكودا - ويسترن بنفسجي ويسترن أحمر - ويسترن أخضر - سيجيت ديسكتوب بالترتيب دا خليهم أولوياتك لو هتشتري فئة إقتصادية كلهم شبه واحد و الفروقات طفيفة .

أشهر الشركات المتخصصة فى صناعة الهاردات ال hdd

Western Digital - Seagate و من بعدهم فى شركات تاني زي Maxtor - Hitachi - Samsung - Toshiba لكن الأفضلية لأول شركتين طبعاً لو متوفرين قدامك .

هارد ديسك ssd

تاني انواع من وحدات التخزين ، و دا بيركب على السوكيت الـ Sata فقط مفيش منه أنواع لـ سوكيت الـ IDE و دا أسرع نوع هاردات موجود حالياً ، لكن سعره غالى سرعة الهارد دا بتتحدد حسب نوع السوكيت الخاص بيه و أي تكنولوجي إضافية الشركة المُصنعة عاملاها عشان تميزه و ملوش عدد لفات ، لإن التقنية بتاعته إلكترونية مش ميكانيكية بيبقى عبارة عن شرائح متصلة ببعض على البوردة شبه الفلاشة كدا و دى تقنية سريعة جداً و هى الأحدث . و بيكون الحجم الخارجي للهارد صغير مقارنةً بـ الـ hdd و بيبقى مُصَنع من البلاستيك أو المعدن الخفيف و وزنه 120 جرام بالكتير على عكس الـ hdd إللي ممكن يوصل 800 جرام و عشان تحس بفرق السرعة كوقت مش كأرقام و تدرك الموضوع أوي الوندوز لو بيفتح و يحمل البرامج على الهارد الـ hdd فى دقيقة مثلاً هيفتح على الهارد الـ SSD ف 10 ثواني تقريباً و هكذا بإختلاف الموديلات و أنواعها .

انواع الهاردات والفرق بينها وايهم تختار ssd

افضل الشركات المصنعة Samsung - Kingston - Corsair - Crucial - Team - Adata و مؤخراً شركة Western Digital دخلت سوق الـ ssd بكذا موديل و فيه موديلات حديثة من الـ ssd تحت إسم M.2 - NVME دا أخر تطوير للفئة بتاعة الـ ssd بشكل عام و هي أسرع وحدات تخزين ف العالم حتى الأن فيه منها كذا إصدارة مُطورة بتركب على مخرج إسمه M.2 بيتوصل مباشرةً على البوردة ، مش بكابل ساتا عادي زي إللي بنستخدمه نوعية الـ ssd دا بتبقى شبه الرام تقريباً و المكان بتاعه ع البوردة مش موجود إلا في الأجيال الحديثة فقط من الاجهزة . معضلة كبيرة و خناقة هتلاقيها ع هل ينفع نقول ع الـssd هارد و لا لأ هو علمياً مينفعش ، لإن هارد جاية من كلمة ( صلب ) ترجمة حرفية و دي بنقولها ع الهارد الكبير العادي ، لإنه فعلياً صلب لكن الـ ssd تقنية تاني و تكوين تاني ، مينفعش نسميه هارد لكنها بتتقال كمصطلح دارج مش أكتر و إن كان مش صح بس عادي يعني المهم إنك تبقى فاهم و كلنا فاهمين مع بعض .

هاردات SSHD

دا خليط و دمج بين النوعين إللى قلناهم فوق يعني الشركة تعملك ف الأول مساحة بتقنية زي الـ ssd و باقى الهارد تخليهولك ب تقنية الـ hdd بحيث تسرعلك أداء الوندوز و برامجه نفس فكرة إننا نشتري SSD و نخليه للوندوز و البرامج بس مش منتشرة أوي الهاردات دى و محققتش نجاح كبير ف السوق و سعرها أغلى بسيط من الـ hdd العادي .

الهاردات الأفضل فى فئة ال ssd

فيه تنافس شديد جداً بين الشركات و أغلب الموديلات إللى جربتها متقاربة جداً لبعض بس هتلاقي ف المقدمة سامسونج و كورسير كمان إي داتا و كروشال ، و البقية من الفئات الإقتصادية من الـssd بالذات موديلاتها كتيرة و لازم تقارن كل موديل بالتاني بدقة عشان تعرف تختار مع وضع السعر ف الإعتبار طبعاً .

ازى تشترى الهارد او تختارة

لما تيجى تشتري أى هارد ، أول حاجة تشوف السوكيت بتاعه إصداره و سرعته إيه و لو hdd تشوف هو كم لفه فى الدقيقة . الأغلبية مش هيعرفوا يشتروا ssd بمساحة 2 تيرا مثلاً عشان السعر فـممكن تجيب ssd 120 و تنزل عليه الويندوز و تكمل على الجهاز بـ hdd يكون إصدارة سريعة زى الويسترن الأزرق مثلاً ، هتبقى عملت أداء مقابل سعر بشكل ممتاز و فى حركة لذيذة ساعات بعملها لو بلعب لعبة تقيلة و عاوز أفضل أداء للجهاز باخدها كوبي ع الديسكتوب إللي هو تابع لـ الـ ssd و بلعبها عليه و لما اخلصها أو بحتاج مساحة بشيلها و هكذا .

معرفة أفضل أنواع الهارد عند الشراء

عشان تعرف الهارد سليم كـسوفت وير و لا لأ لما تيجي تشتريه أهم حاجه تشوف عليه باد سيكتور و لا لأ و دا بإختصار بيبقى مشكلة فى نظام الهارد بتكشف عليها ببرامج زي HDD RE GENERATOR و أحياناً بتتحل و أحياناً لأ و لازم يبقى هيلث 100% أو 90% على الأقل و دا بإختصار عمر الهارد الإفتراضي و كفائته و بتشوفه ببرنامج زى HDD SENTINEL و لازم يبقى مش بيعمل صوت تكتكة أو أي صوت غريب عن العادي و يكون مش بيسخن و حرارته طبيعية و الحاجات دي في برامج بتشوفها و تكشف عليها بسهولة .

معلومات عن انواع مساحات التخزين HDD vs SSD وايهما أفضل 2020

طريقة التحميل من الموقع الخاص بنا اذا كنت لاتعلم كيفية التحميل

google-playkhamsatmostaqltradent