من هم أنونيموس Anonymous
فيه شخص اسمو كريستوفر بول صاحبو بيقولوا مووت اسم دلع زي تاح كدا سنه 2003 عنده دلوقتى 32 سنه يعني كان صغير اوى ساعتها عمل موقع اسمه فور تشان !
الموقع لو شوفتوه شكله مسخره او ى بسيط بغباء عامل زي منتدي من سنه 1996 مثلاَ متقسم أقسام كدا وبس
الموقع دا فكرته انك بتخش مابتعملش مستخدم ولا اى شيء وبتعمل فيه بوست لأى شيء كل قسم فيه اسمو بورد او لوحه
كل لوحه فيها كل شيء - طبخ - عربيات - سياسه - ضحك - جنس كل شيء.
الموقع دا فيه بورد اسمو ( بي ) حرف بي , ودا بورد الراندوم يعني العشوائي يعني كل شيء ماشي مفيش اى شيء تتخيلوه منزلش هناك كل شيء حرفياً بدون قيود لدرجه بشعه بشعه انتو مش متخيلين اللي هناك حتى كان فيه مقولة معروفة بيقولك بورد بي معمول عشان يخلي الناس الى تخش بي مره متخشوش تانى
لو البشر لابسين اقنعه ومعاهم حريه التصرف
فور تشان عكس فيسبوك تماما الشخص غير معرف تماما ودي بترجعنا لمعضله القناع ( لو البشر لابسين اقنعه ومعاهم حريه التصرف؟) هيعملوا ايه؟
اكيد بعض الاجابات هتقول ان فيه ناس هتبقى هيروز وتبقى حلوين وفيه ناس هتبقى بشعه جدا المهم كل البشعيين دول راحوا بورد بي دا
الفكره بتاعت الموقع انه بيحافظ على خصوصيتك جدا اولا الموقع مش متأرشف خالص بمعني كل فتره كل شيء بيتمسح
ومش متراقب او متراقب بس سو وات؟ محدش هيعرف مين بيعمل ايه
وعشان يحافظوا علي دا الموقع كلو اى حد يعمل بوست فيه بينزل البوست بكلمه ( غير معرف ) او Anonymous او شخص ( مجهول ) .
بمعني انت لما تخش وتنزل بوست اسمك مابيظهرش بيظهر كلمه اننونيموس اتوماتيك .
تانى مصطلح وهوا كلمه Trolling
كلمه ترول - دلوقتى انتشرت يعني بينا في الكلام - معاناها انك بتضايق / بتتريق / بتضحك على حد وتشتغله بغرض التسليه والضحك والكلام دا فضل لحد 2007 تقريباً كانو بيعملوا ( طلعات ) على اشخاص ومواقع والعاب اونلاين لمجرد الضحك والتسليه
وفي مصطلحات الانترنت الطلعة دى اسمها Raid
كمان هما اللى اخترعوا حاجه اسمها ميمز والترول فيس والجاجات دى كلها , اللى هوا حرفياً مفيش ميم ظهر على الانترنت وبيستعمل لحد الآن ومنتشر إلا اذا كان ليه علاقة بقريب او بعيد ب
لكن لما جت 2008 بدأت الأمور تختلف شوية بدل الطلعات بدأوا باخدوا بالهم من المنظمات او الكيانات اللى بتهدد حرية التعبير على الانترنت وبدأ هما نفسهم يبقى ليهم لوجو اللى هوا قناع ( جاى فوكس ) من فيلم فانديتا V
فكره الانونيموس انهم ( لا مركزيين ) لانهم انتشروا فى كذا موقع والتواصل بينهم كان بيتم ماسيف او عن طريق مجموعات وبوستات بمعني اصح فى المواقع دى يعني مينفعش كان تمسك مؤسس او رئيس فيهم
بدأ يبقى ليهم تنظيم وهجوم مركز فمثلا سنه 2009 كان في موقع مشهور جدا اسمو ( زا بايرتس باى ) ودا موقع تورنت بمعني اصح تقدر تحمل من عليه كل شيء تقريبا ً ببلاش !
منظمه اسمها الاتحاد الدولي للصناعة الفوتوغرافية
الموقع دا جت منظمه اسمها الاتحاد الدولي للصناعة الفوتوغرافية ومسكوا اصحاب الموقع دا فشخوهم وقفلوا الموقع .
اترفعت قضيه وانونيموس كانت مترقبة وصاحب الموقع خسرها واتقال عنه هاكر بسبب الموقع بينزل فيه افلام واغاني ببلاش وهنا قامت انونيموس بواحده من اوائل هجماتها على الاتحاد دا وفرتكوا الموقع بتاعهم حرفيا وبهدلوهم وقالوا جملة شهيره ( سنظل نهاجم من يتبنى الرقابة، لن تستطيعوا إخفاء المميز )
من النقطة دى الاكشن كله بقا
كلمه سينتولوجيا
دى مجموعة افكار وحاجات دينية ( مش تابعه لاى ديانه ) كان عاملها كاتب خيال علمي اسمو رون هوبارد , الديانة او التوجة الديني دا من ساعة ماتعمل وهوا حوار ومخيف وغريب لان منغلق جدا جدا وسري وليه قوى رهيبه انو بيدمر اى منتقد ليه على مستوي العالم بمعني فيه ناس قوية جدا متبعة الديانة دى
مش هدخل فى تفاصيل بيأمنوا بأيه ولكن من الناس اللى بتآمن بالديانة دى فتره طويلة كان الممثل توم كروز وفي اواخر 2008 طلع توم كروز في فيديو وقال كلام عن الديانة والكلام دا بقا مثير للجدل وهنا الكنيسة دى ( مش كنيسة مسيحية ولكن دا اسمها الحقيقي كنيسه السينتولوجي ) المهم ادخلت ومسحت فيديوهات بالقوة من مواقع كتيره بتحكي هنا ودا طبعا عصب الانونميوس جدا وبعته فيديو مشهور اوى اسمه ( رسالة إلى السينتولوجيا ) يوم 21 يناير 2008 ! وقالوا لهم الافعال اللى بتعملوها دى تعتبر رقابه على الانترنت ومستحيل نخلي حاجه زي كدا تحصل حرية المعلومات وحرية البيانات من حق كل بشري
وبدأ هجوم دي دوس - هبقى اشرحه بعدين - بس هوا نوع هاك على كل مواقع الكنيسة بدأ ايميلات سبام ومكالمات فيك بشكل مخيف من انونيموس وكل اجهزة الفاكس في الكنيسة كانت بتطلع ورق اسود
اول ظهور على ارض الواقع لأنونيموس
وبعدها كان اول ظهور على ارض الواقع لأنونيموس سنه 2008 فبراير واحد منهم قال انا هنزل فى ميدان معين فى نيويورك ومحاتجكم تنزلوا معايا الناس قالت لا وناس قالت اه ونزل لوحده يومها , وكانت المفاجاه ! انوونيموس كتيييير نزلوا فى كل عواصم العالم حرفياً وكان كلها ضد الكنيسة وتوصيات ان دايرة الضرايب تروح تشوف الكنيسه دي ايه ظروفها
والاتاك او الهجوم دا كان بداية الفكره وكان اسمو ( مشروع تشانولوجي)
اذكر عمليه تانيه برضه موقع Wikileaks دا موقع مشهور اوى اوى كان بيسرب وثائق ومعلومات رهيبه عن كل دول العالم
والمفروض ان اي موقع فى العالم بيكون فيه وسائل دفع حتي لو حاجه عشان التبرع االمهم الموقع دا كان مهاجم من كل دول وحكومات العالم لانو كان مرعب وبيطلع اسرار زباله اوى
شركه ماستر كارد وشركه باي بال وقفوا دعمهم للموقع بحيث ان الموقع دا مينفعش تتبرعله بفلوس وتوصلوا عن طريق الاتنين دول
مع ان في نفس الوقت فيه مواقع حرفياً نازية بفكر هتلر وعادى ممكن تتبرع ليهم مفيش مشكله
المووضوع دا عصب انونيموس تانى لان كل فكرتهم حرية التعبير والانترنت
وكان الهجوم دا اسمو ( Operation Payback (2010)
ودا كان سنه 2010 وكان مرعب انا فاكره لحد الان وفاكر لحظتها وقفوا تمامااااااا باى بال وماستر كار رد اونلاين يومها وامازون وفيزا وكام بنك سويسري حرفياً رعبوهم .
آرون بار
اخر حاجه وليست الاخيره هقولها برضه كانت ضحك جدا واحد اسمو آرون بار , الراجل دا عنده مؤسسة او شركة في مجال الحماية من القرصنة والكومبيوتر الراجل دا غلط غلطه عمره بأنه قال انو كشف مين انونيموس وعرف معلومات عنهم وسلمها للشرطه وطبعا كانت غلطه شنيعة
اول شيء اخترقوا موقع الشركة اللى هيا اصلا شركة حماية من الاختراق وشالوا الصفحة الرسمية وكتبو ( لا تعبث معنا )
واخدوا التحكم الكامللللل في سيستم الشركة الامني كلو ومسحوا 68000 الف رساله من السيستم نفسه ومسحوا سيستم التلفون الداخلي ووقفوة تماما واخدوا كل اسرار الشركة ونشروها للشركات المنافسه ليه فى السوق وبعد كدا دخلوا على ارون بار نفسه نشروا عنوانة وعنواين بيوته كلها ارقام تلفوناته الشخصيه كلها وسرقوا ووقفوا اكاونت تويتر بتاعه
فيه عمليات كتيره اوى اوى يعني مثلا عملية غزة وعمليه اسرائـ.يل الاتننين دول كان رد فعل على قتل فلسطينين! وبهدلوا اسرائيل وانا فاكر يومها كان اذاعة اسرائيل مشغلة قران واللى عملها كان قسم مصر فى انونيموس والجزائر والمغرب مع بعض ومع امريكا
فيه حاجات كتير اوى اوىووووووووى انا اعرفها عنهم برضه وعمليات كتير بس مش عارف احكي ايه ولا ايه
سنه 2015 برضه اختلفت شوية ايديوليجية انونيموس وبقت مختلفه شوية ومسيسة بس ناس بتقول مش هما دول
اتقبض فى يوم على ناس كتيره منهم بس كلهم طلعوا يعني وفيه منهم اللى قضي فترات وكدا
اخيرا ولا ليس اخراً , على موقع فور تشان اليومين دول عندى احساس من البوستات والبوردات اللى هناك ان انونيموس بترجع وبترجع بشكل مرعب ومخيف وجواهم غضب مش طبيعي من حاجات كتير.
كاتب هذا المقال
هو أحمد محمد وهو فنان ، خطاط ، مسوق رقمي صانع المحتوى.من القاهرة مقيم حاليا بدولة الكويت
حسابات التواصل الاجتماعى الخاصة بالكاتب